ترااا ماصارت
بس خلاص ,, لاعة جبودناا
مو ناقصين هم و غلقه و ضيقة خلق !
السربته ! لاحقتنا حتى بالانترنت !!
ظاهره غريبه منتشره هالأيام و كل مالها و تزيد
أجي للبيت مندفع و متفائل للدخول الى عالم آخر على اللابتوب و أول ما أفتح الإيميل و أشوف الرسايل يضيق خلقي !
و
أدش على جم منتدى ,, و يزداد إحباطي ,, إحبااااط
أنا مسوي إيميل للمراسلات المهمه و علشان أستانس و أستفيد و أتعلم أشياء جديده و مفيده
أدش المنتديات و المدونات علشان أناقش و أسمع وجهات نظر و أفيد و أستفيد !
أفتح الإيميل و أشوف الرسايل !! أتحسف على الساعه اللي عرفت فيها الانترنت !!
رساله تقول ,, أن عصير البرتقال القواطي فيه ماده إتسبب السرطان
و
كورن فلكس النمر يسبب داء الجنون
و
والبلاليط مصنوع من أمعاء القطط
ناقص يقولك بعد ,, أنه المرتديلا إتسبب شد عضلي بالزلف !
لااااا ,, و السربته صج باللي يدزلك قائمة بالمواد الغذائية اللي فيها مادة
abcd xwz 007
!! و اللي تقطع النسل و إتسبب الهيجان و إتوسع فتحة الأوزون و إتخلي الواحد يقعد الصبح و يقول ميااااو
هذا غير هالمعلومه الجديده اللي تم إكتشافها !
الدونت و البطاطس المقلية مخطط شنيع لنشر الصهيونية بواسطة دهن الخنزير !
و اللي عايش الدور صح وذابحته القوميه العربيه يقولك
أمريكا تغزو ديار العرب و المسلمين بواسطة شيبس ليز و سنكرز ، وقد وجب الجهاد !
و اللي مقطع نفسه بالابحاث العلميه و الدراسات يقول !
شرب الماء البارد بعد المجبوس = سرطان القولون ، وإلا سرطان الجهاز الهضمي >> إختياري !
شرب اللبن قبل الدجاج المشوي ( البروستد ) = قرحة في المعدة إلى الأبد وماتروح ( كفاله مدى الحياة ! )
أكل السلطة في صحن مسطح من غير ليمون إتسبب ديسك في الظهر و الرقبة !!
و إذا مع ليمون إتسبب التهاب المفاصل والركب و إتقوم تركض و انت ماتدري (:
خبز الخباز يسبب أمراض الكبد و إنفلونزا البجع !
لا تاكلون سويت
لا تاكلون برجر
لا تاكلون آيس كريم
لا تاكلون سمارتيز
لا تاكلون خبز و جبن
لا تتنفسون - لا تسولفون - لا تشربون - لا إله إلا الله (:
شدعوه يااا يبااا
شناااكل بالله !
ماكو إلا إنطيحله ,, خبز و سعف !
شيليز و كرسبي كريم و ماكدونالدز و ستاربكس و بيبسي ماعندهم شغل إلا يوكلون المسلمين منتجات الخنزير !
كل شي مسرطن !
كل شي مؤامره صهيونيه ضد المسلمين !
عيب , والله عيب على اللي يصدق هالسوالف و يساعد بنشرها !!
الموبايل يسبب التيفوئيد !!
الصابون يسبب مرض بس مايدرون شنو ! المهم انه مرض !!
وشامبو جونسون مخطط للقضاء على الطفل العربي !!
واللابتوب يسبب الحصبة !
والواير مال تلفزيون الصالة فيه ذبذبات خطيرة تسبب جنون البقر !
زيييين ,, أشوه أني تلاحقت على عمري و قريت هالايميلات ,, و الا جان أنا الحين أخر حليب << بسبة جنون البقر !! (:
هذا كله بصوب ,, و الأخبار العاجله و المستعجله و الهامه و المهمه جدا ,, بصوووب !!
إحذروا ,, الأمر خطير .... لا يجب السكوت عنه
في محطة بانزين قرطبه : سيدة أخذت كارد فيه مادة مخدرة و صكتها دوخة وباقوا فلوسها
هام جداً جداً جداً جداً جداً جداً جداً
القبض على عصابه في مجمع المارينا ,,, تنقل الإيدز
ثلاث بنات مقنعات ,, هوايتهن دعم الشباب بالسياره !!
شهالخرابيييط !!
ليش هالاشاعات هذي !!
هذا بصوووب
و فتاوي الحلال و الحرام بصووووب
أول مره أعرف أنه أكو شي حرام و شي حرام مضاعف !! يعني دبل حرام !
التلفزيون حرام
مشاهدة الأفلام حرام
السفر الى ديار الكفار للسياحه ,, حرام مضاعف !
تشرب زقاير ,, حرام
السينما حرام
الضحك قليلا حرام ,, و ,, كثيرا ,, حرام مضاعف !
هذا غير جماعة ,, أرسلها ,,
- كلكم لازم تقرون الإيميل و إطرشونه حق 10 أشخاص عالاقل ! و إلا أنت علماني كافر وما تبي حسنات !!
- أرسلها و لك 236 حسنه على الحرف !
- أرسلها علشان تبنيلك شاليه بالجنه !!
- أرسلها علشان يجيك الملك وانت نايم و يعطيك بوسه !!
- أرسلها علشان يتوسع قبرك اذا مت !!
- أرسلها و لا يقص عليك الشيطان !!
- أرسلها أقوووووووولك !!
أستغفر الله العظيم
هذووولا ,, من صجهم !
شنو هالحياة اللي يعيشونها !! ضيقة خلق و نكد و حرام في حرام !!
يباا ترى الدين ,, صدقه ,, نصيحه
قال الله تعالى ,,, ( ولا تكن فضا ً غليظ القلب )
و هذولاا ,, إلعنوا أبو خير القلب !
بدال لا يحببون الناس للدين و الاسلام ,, طايحيله إتخرع بهالعالم !!
ثعبان القبر يجي و يلتف على عضامك و يكسرها !!
الملائكه يبطون راسك بصخره من نار اذا ما كنت إتصلي صلاة الفجر بالمسجد !!
لاحول و لا قوة الا بالله
شغلات واقعيه غريبه هربنا منها و إتجهنا للأنترنت !! و لقيناهاا قدامناا
ويييييييين إنووولي !!
و صدق الشاعر اللي قال
لكل داء دواء يستطب به ,,, إلا الحماقة أعيت من يداويها
** ** **
كــــــ( الغلا )ــــــل
لوووول
ردحذفهذا كله يهون
آنا ما يغثني الا اللي كاتبين فيه امانه في عنقك الى يوم القيامه ولازم تدزها حق ستين الف واحد ولا ترى الله يلعنك و ما تشم ريحة الجنة!!!
السلام..
ردحذفاي الايميلات صايره تغث..
و توني قبل لا انام قريت ايميل عن ان البيبيسي يسبب انفلونز الخنازير..
وضحكتني مال الملك اللي بيحبك وانت نايم خخخ..
ولا في ايميلات مادري شالحكمه من ارسالها ونشرها اللي يصير فيها صور مقززة وتعور القلب اوادم مقطعين او ميتين موته شنيعه الله يرحمهم ويحسن خواتمنا يارب..
ولا ايميلات البدع ..
ولا الايميل فيه سايت مصدر عشتو للمصداقيه لما تجيك عليه يطلع الايميل بشي والسايت عن شي 2 !!
مشكور اخوي..
SHOOSH
ردحذفأيييي و سالفة الامانه مشكله هذي يقطونها بـ راس الواحد و يوهقونه (:
لا و في منها بعد اللي يقولج أرسليها ولج 573 حسنه ! (:
أعتقد أن سبب نشر هالرسائل هذي إهو الرغبه بالشهره و التشيحط بالانترنت ههههه
نوورتي مضاربنا
رورو الشخبوطه
ردحذفوعليكم السلام و الرحمه
هههههه البيبسي يسبب إنفلونزا الخنازير و صارلنا سنين و إحنا نشرب منه ماشفنا إلا الكرش بــس (:
و
على طاري الرسائل اللي إتلوع الجبد
قبل فتره وصلتني رساله فيها صور للمرضى المصابين بسرطان اللثه و العياذ بالله
لو تشوفين هالصور ,, إسبووع ماتنامين(:
و
مايضحكني إلا الرسائل اللي يجي معاها مصدر ! و إنشوف المصدر و إلا موضوع عادي بإحدى هالمنتديات !
و الشكر موصول لج على هالتعليق الحلوو
تحياتي
أزال المؤلف هذا التعليق.
ردحذفانا ايميلي ما ادشه من هالايميلات الخربوطة اللي توصلني
ردحذفاذا بنسمع كلامهم ماراح يبقى شي بالثلاجة
وسالفة الامانة من امه طاف
تلاقي كاتب سورة الفاتحة واذا ما دزيتها بينزل عليك العقاب الشديد
يا حااافظ
لا وعباقرة الزمان طلعو اشاعة ان دوا انفلونزا الخنازير تزيد الاصابة بالمرض
حمدلله والشكر
ريح بالك/ج وحولهم عال junk mail
ههههه حلوة شالية بالجنة
ردحذفانا هالخرابيط محاربها من زمان ومن عنوان الايميل صرت اعرف محتواه ، فيني قوة حدس واقدر اعرف هالايميلات من العنوان
في حلقة حلوة ببرنامج خواطر كان يتكلم عن هالمواضيع والمؤامره واإرسلها وتاخذ مادري جم حسنه ، ومع هلا فبراير يقولك العروض تزيد بدال الحسنة تاخذ 5 .. ما يندرى ننطر شهر 2 مادري 3 ، هلا فبراير كل ماله يتأخر لوول مثل حالنا وحال امتنا الرديئة .
c’est La Vie
ردحذفأي والله ماكو إلا أهد الإيميل موليه (:
المشكله إنه في بعض القروبات يسجلوني عندهم وانا مادري و أتفاجأ برسائلهم اللي من هالنمونه !
بس سالفة دواء الخنازير هذي عجيبه ! ههههه زين واللي تعالجوا من المرض شلون !
ميييرسوو على هالزياره أخيتي (:
هههههههههههه
ردحذفناقوس
يسوونها والله ويحطون عروض خاصه حق هلا فبراير (:
صارت الشغله بكيفهم !
و أتوقع بعد جم سنه تلقى الواحد في آخر اليوم معاه آله حاسبه و قاعد يحسب و يجمع و يطرح علشان يشوف محصول اليوم من الحسنات !
يا أمة ,, ضحكت و تقهقهت من جهلها الأممُ .
ما ننحرم من هالطله و صاحبها
تحياتي
هههههههههههه
ردحذفصراحه
مت ضحك وانا اقرى التدوينهه
شكلك شايل بقلبك وساكت
ومجمع هذا كله من زمااااااان
واليوم خلاص انفجرت
وطلعت كل اللي عندك
يعني مال عشر سنين
لووووووووووووووول
ههههههههههههه
ردحذفهلااا إقصوصه
شسووووي ,, من بطة الجبد (:
صارلي سنين و أنا قامت بقلبي و ساكت ليمن صكني حارج (:
لأ ,, بالذات الحين , زادت هالرسائل حيييل مادري عندي انا بروحي بس ! و الا عند الغالبيه منكم !
عاد قلت خل أطلع ما في جعبتي أحسن (:
و
آنستي و نورتي بهالزياره أخيتي
تحياتي
الإيميلات انتفت مصداقيتها عندي من فترة طويله
ردحذفأغلبها معلومات غلط وإشاعات
هههههههههههههههههههه
ردحذفالخير عندنا وعندك
من كثر الايميلات اللي مامنها فايدة
صرت ما افتح الايميل
بس في اشيااء فيها شوي من الصحه
تسلم ع الموضوع
تقبل مروري
صمت البوح
مها
ردحذفهههه أي والله صدقتي و فعلا الايميلات باللي فيها أصبحت مالها مصداقيه من كثرتها و صار كل من هب و دب حطله معلومه و نشرها (:
و
مشكوره على هالزياره
تحياتي
صمت البوح
ردحذفيا أهلين و سهلين خيووو
والله شووف ,, في إيميلات زينه ومعلوماتها صحيحه ,, بس شلون اتعرفها !
الشين من كثرته خرب على الزين وقمنا مانعرف أيها الصحيحه من اللي موو صحيحه (:
و
تسلم على مرورك الطيب
تحياتي
loooooooooooooool
ردحذف9ij walla.. hal emaialt etyeeb el mara'9.. ana wayed atnarfaz lain agra emailat chee oo 9ara7a i delete them seeda!
yet.. fe emaialat et5are3ni 9ara7a :p ena oh latakloon chee mo zain or latakloon chee mo zain.. bas sheno tam zain nakleh?!
lol nice topic dear ^^
Butterfly Chick
ردحذفههههههههه
أي والله خرعونا و كرهوونا الأكل كل شي ضار بالصحه و يجيب المرض ,, يعني شلووون مااانكل (:
و
تسلمين عالطله الحلوووه
تحياتي