كسرت الملل و الروتين اليومي ,, الممل !
و الحمدلله ,,, إنكسر !
(:
بعد نصيحة واحد من الربع ,, بتجربة الإبتعاد ( مؤقتاً )
عن متابعة أخبار الديره !
و عدم قرائة الجرايد بكل أخبارها اللي إتجيب ,, الحارج ,,
و عدم مشاهدة فضائياتنا المحليه ,, خصوصا هذيج الفضائيه اللي فيها المخرج يمثل ببرنامج ,, كامره خفيه !
والإبتعاد عن الحديث في شؤون الديره و اللي يحصل فيها و خصوصا ,, سوالف أعضاء المجلس !
و تجنب المداحر و المناشب مع الشباب الحلوين في بعض المدونات و المنتديات النقاشيه !
و التركيز أكثر ,, على ما يحتويه الانترنت من منوعات و معلومات مفيده .
و الإبتعاد عن الديوانيات اللي كل روادها خبراء بالدستور و يدعون معرفتهم بالسياسه و الرياضه و الإقتصاد و يعرفون كل أسرار و خبايا الديره !
و الذهاب فقط , للديوانيات اللي فيها لعب جنجفه و زقاير ! (:
و بعد سفرة يومين ,, لـ حفر الباطن ,, و حضور حفل زواج + صلة الأرحام + ماااكو شغل ! (:
بـعـد هالأحداث و التغييرات البسيطه اللي صارت !!
حسيت أني إنسان ثاااني
قمت انام بسرعه بدون أرق و هم و تفكير ! << لايكون وكيل وزاره و انا مادري ! (:
قمت أتحلم أحلام سعيده .
قمت أضحك بعد إنقطاع طويل عن الضحك !
قمت آكل و أنا نفسي مفتوحه للأكل !
قمت إتحجى مع الناس بنفس حلوه و من نفس حلوه ! , بدون تصنع و مجامله !
قمت أحسن الظن ,, بالناس !
قمت أسمع أغاني فيروز و مياده الحناوي !
و غيره و غيره و غيييييره من الاشياء اللي تحسنت عندي
صرت خوووش ,, نــفــر
صارت الحياة ,, عندي الحين ,, حـــلـــوه !
يكفي ,, أني أعدت النظر بمسألة الزواج ! ,, بعد ما كنت غاسل ايدي من هالسالفه !
نصيحه طيبه بصراحه
و
شعور جميل ,, وحياة أجمل عشتها ,, بعد الأخذ بنصيحة صديق الطفوله !
أنصحكم بتجربتها ,, حتى لو مؤقتا ً
و راح إتحسون أن الحياة ,,, شــــقــــد حــــلــــــوه (:
** ** **
بس بو طبيع ,, ما يخلي طبعه !
و
الطبع ,, يغلب التطبع !
و
من شب على شئ ,, شاب عليه !
و
لأننا شعب بلاغة الشف !
و
لأني ,, بالكويت !
و
بسبب كل ما سبق !
فـإني ,, متشوق و متلهف لسماع رأي المحكمه الدستوريه بأزمة الحجاب !
و إنشالله ,, ينتصر الحق و العقل و المنطق ,, في هالمسأله اللي أعتبرها ,, نقطه سوداء و عار في تاريخ الديموقراطيه الكويتيه !
و
إن غـــــداً ,, لـــ نــــاظـــره ,, قـــريــــب
*
*
*
أووورفوااار
توني رادة فريش من بعض الأمور
ردحذفالشعور جميل :)
أتمنى لك حياة سعيدة
:)
حياتي هدف مو عبث
ردحذفيعني جربتي تجربتي (:
شرايج بالشعور الخلاب ! صج صج أحس أني فريش على قووولتج هههه
و
منووره أخيتي (:
حلوه المقدمة لول !
ردحذفبالتوفيق :)
السياسة ما منها إلا عوار الراس
ردحذفأنا كنت ناشطة سياسية بعدين هونت عنهم
لأنه ماكو فايدة فيهم إلا لمن تصير دائرة وحدة و نفتك من فلان وفلان اللي عالين جبودنا من سنين وأهما سبب الخراب والفساد
يعني... لمن تصير دائرة وحدة يمكن بعد أهتم فيها, يمكن لأ.....
لأنه السياسة بالكويت لعب يهال